Partizani ndalet në Gjirokastër ndërsa Kukësi bën detyrën

0

Partizani nuk arriti të shkojë më shumë se një barazim 1-1 në transfertën e vështirë gjirokastrite ndaj Luftëtarit. Të kuqtë gjetën avantazhin në pjesën e parë me anë të mesfushorit nga Prizreni, Esat Mala, por Luftëtari riktheu baraspeshën në minutën e 56’ me anë të Mersin Ymerajt.

Në stadiumin “Luftëtari” u zhvillua një sfidë mjaft interesante, me luftë të fortë sportive dhe mjaft raste shënimi, ku më flagranti ishte ai i Rapos në minutat shtesë, por topi nuk përfundoi në rrjetë.

Sfida tjetër e ditës së sotme, ajo mes Kukësit dhe Kastriotit, e zhvilluar në stadiumin “Elbasan Arena”, përfundoi me fitoren e lehtë 2-0 të skuadrës verilindore.

Vesel Limaj në minutën e 3-të dhe Reginaldo në të 36-ën ishin autorët e golave për skuadrën e Cungut, që më pas administroi qetësisht avantazhin, duke kontrolluar lojën dhe duke mos i dhuruar asgjë kundërshtarit.

Me këtë fitore, Kukësi ngjitet në vendin e dytë të renditjes me 34 pikë, vetëm 3 më pak se Partizani kryesues dhe një më tepër se Teuta që e mbyll gjysmën e parë të sezonit në vendin e tretë.

Nga ana tjetër, Kastrioti mbetet në vendin e fundit me 10 pikë, 5 më pas se Kamza e parafundit, ndërsa skuadra e Gjokës, bashkë me Luftëtarin dhe Tiranën, duket se do të luftojnë deri në fund për të mbijetuar në Superiore.

PËRGJIGJU

Please enter your comment!
Please enter your name here